Urola Kostako Hitza

Ez zen euskararik entzun Murkileko karpako break dance lehiaketan

Sekulako txiribueltak, kristoren itzulipurdiak, harritzeko moduko malgutasuna. Murkilen karpan egin zuten break dance lehiaketa harrigarria, dibertigarria, erakargarria... eta burura datozkidan garri guztiak izan zen.Eta, noski, horietako bat behintzat hizkuntzari dagokiona: lotsagarria.
Berandu iritsi nintzen finalera eta ordurako hasita zegoen. Ez dakit aurretik nola hitz egin zuten, baina ni nengoen bitartean behinik behin gazteleraz. Gaztelera soilik. Hori bai, oso gaztelera kalekoa, break girokoa, bazter auzoetakoa zirudiena, ia-ia Harlem edo Browklingekoa. Alegia, oso hizkera egokia gisa horretako lehiaketa baterako. Baina xehetasun txiki bat ahaztu zitzaien: ekitaldia Zarautzen zela, «herri euskaldun» batean. Halaxe diote (kakotx artekoa) askok eta askok, herritarrek eta politikariek. Baina, larunbatean Munoako karpan egon zenak belarriak zorroztu eta begiak itxi izan balitu (ez zen erraza, ikuskizun hartan), konturatuko zen hangoa ez zela gure hizkuntzaren break dantza. Hangoa, Eurovision estilokoa zen: El breikidans. Eta niri grazia zipitzik ere ez zidan egin.
Nork du horren ardura?
Eta errua ez dute inondik inora gerria hautsi beharrean dantzan jardun zutenek, haiek beraien ohiko giroan baitzebiltzan. Ardura ekitaldia antolatu zutenek dute: Udalak eta Murkilek. Aurkezleak euskaraz egin dezan bermatu behar dute beti (salbuespenik gabe) eta aitzakiek ez dute balio. Eta herri honetan badago break dantza lehiaketa bat umorez eta Harlemgo estiloan ederki aurkeztuko lukeenik. Hasi dantzan hurrengoan berdina gertatuez dadin!