Urola Kostako Hitza

Zarauzko Nazioarteko IX. Jazz Mintegiak bete ditu aurtengo lanak. Igandean izan zen azken eguna eta O´liden´s Band-en kontzertu jendetsuaren ondoren, ikasle eta irakasleek egin zuten azken saioa.

Jazzaren azken arnasa, bizi-bizi

xabi aizpurua ugarte

Amaitu dira jazz doinuak aurtengoz. Zarauzko Nazioarteko IX. Jazz Mintegiak igande gauean itxi zituen ateak eta antolatzaileek «oso gustura» daudela adierazi zuten atzo. Munoako karpan egindako jazz emanaldiei dagokienez, jende mugimendu oparoa izan da egunero: «Bederatzi urtetan herritarrek ohitura hartu duela ere esan daiteke». Esate baterako, Mikel Anduezaren taldeak entzule ugari erakarri zuen ostiral gauean.

Dena den, karpa osoa borborka jarri duen emanaldia O´liden´s Band talde zarauztarrak egindakoa izan zen. Publikoa gogotsu joan zen eta giro ederra sortu zuten musikari zarauztarrek.

Ikasle kopurua, behera

Aurten, iazko joerari jarraituz, ikasle kopuruak behera egin du eta batez ere goi mailako urratsetan sumatu dute ikasle falta. Beste mintegi batzuetan ere arazo bera dutela esan du antolakuntzak.