Urola Kostako Hitza

Igandean Zarauzko Iñurritzako zelaietan ospatu zuten Galiziako Egunean euri ugari egin zuen. Dena dela, antolakuntzakoak «harrituta» gelditu ziren galiziarren festara herritar ugari joan zelako.

Olagarroa bezala, bustita

xabi aizpurua ugarte

Galiziako lurretan sarri-sarri egin ohi duen moduan, igandean euri zaparrada ugari izan zen Euskal Herrian ere. Zarauzko Carballeira elkarteak Iñurritzan antolatu zuen Galiziako Egunak ez zuen ihes egiterik izan eta aterki ugari ikusi zen bazterretan. Hala eta guztiz ere, antolakuntzako kideek adierazi dutenez, ez zion askorik eragin festaren martxari, eta «harrituta» gelditu ziren Iñurritzara joan zen jende andarekin. «Igande goizean egiten genituen aurreikuspenak gaindituta gelditu ziren egunaren amaierarako, zalantzarik gabe».

Olagarroak, etenik ez

Jendearen erantzunarekin «gustura» gelditu dira antolatzaileak. Taberna eta saltokietako ordutegia ohi baino gehiago luzatu zuten, 21:00ak aldera arte irekita mantedu baitzituzten postuak. Guztien artean erregina, Morena olagarro saltzailearen postua izan zen.