Urola Kostako Hitza

«Euskal Astearen baitan, euskararen aldeko ekimenen garrantzia eta ezinbestekotasuna lau haizetara zabalduko duen erreferentzia bat sortu dugu: Euskararen Eguna». Bihar izango da, eta antolatzaile diren heinean, AEK-k eta EHEk herritar guztiei ekimenetan parte hartzeko deia luzatu diete. Goizean hasita, euskararen aldeko aldarria herriko kaleetan barrena zabaltzea jarri dute helburutzat. Orain arte, Euskal Jai Egunaren aurreko larunbatean Euskararen Aldeko Herri Lasterketa eta bazkari herrikoia egin dira urte askoan. Egonkortutako ekimenak dira bi hauek, lasterketak 13 urte eta bazkariak 24 urte egingo baitituzte aurten, baina indarrak batze aldera izen beraren azpian bildu dituzte guztiak, egitaraua osatuz eta mezua borobilduz

.
Mezu bakarra, hamaika bide
Euskararen Egunerako prestatu duten egitarauan egongo den berrikuntzetako bat poteoa eta kalejira batuko dituen ekimen herrikoia izango da. Bazkalondoko emanaldiaren ondoren, kalez kale ibiliko dira festarako gogoz bildutako partaide guztiak. 18:30ak aldera hasiko den kalejira honetan txaranga izango dute lagun eta euskararen aldeko aldarrikapenak modu alaian zabaltzea nahi dute antolatzaileek.
Euskararentzat... pixka bat inoiz ez da mutxo! izango da aurtengo Euskararen Egunak izango duen lelo nagusia. Eusko Jaurlaritzak daukan hizkuntza politika «eskasaren» aurrean egindako salaketa gisa aurkeztu dute leloa, Pixka bat es mucho kanpaina ezagunari erreferentzia zuzena eginez.
Mezu oroko horrez gain, eguneko ekitaldiekin harremana duten eranskailuak edo pegatinak ere kaleratuko dituzte, «aldarrikapena maila pertsonalera jaitsi dadin». Nik lasterketa zapatilakin, ta aurreneko hitza euskarakin! edo Nik marmitakua atunakin ta aurreneko hitza euskarakin! izango dira agertuko diren esaldietako batzuk.